京. wrote: 寫左篇廢文，分享下
現在全港上下都集中討論警察同暴徒，好似冇人記得講，始作俑者，係食環署。
警民衝突的問題，涉及甚廣，要講有排講。呢篇長文的主力係插食環。警民衝突部份，有機會，先再寫。
有人話，整個事件係食環署夾埋警察合力趕絕小販。為此，我要講句公道話：掃小販，關警察x事？
處理小販問題，完完全全，絕絕對對係食環署人員的事，警察冇權管，冇權理，就算你打999投訴小販，個 case都絕絕對對彈番比食環署處理，票控係食環的責任，掃走小販係食環的責任，政府有其分工，所謂自己的事自己做，食環的工作不應由警察去擔當的！
之但係，次次食環搞d大行動，往往係用最少的人手，對付更多的人。結果係，人少打人多，捅了個馬蜂窩。一出事，就拿拿臨叫警察幫忙執手尾。咁就有種錯覺，警察係同食環一齊行動。而事實上，警察係擔當擦屁股的角色。而食環呢，恃住出事就有警察幫拖，制訂行動往往未經深思熟慮，結果，鑊鑊新鮮鑊鑊甘，警察每次都做磨心。至於食環人員，每次幾乎係食完花生就走人！以昨晚的行動來說，食環署發出了幾多張告票，撿控了幾多人？似乎沒有！食環的大行動完全係失敗！而當警察和市民打至天昏地暗時，當初吹雞call馬的食環人員去左邊？好似係完好無缺地收隊訓覺。一個無效的行動，引爆一場春節大衝突，主事之人，不能不稱之為「天才」。
老實講，我做左三十幾年人，新春期間，違例泊車唔會點抄牌，小販檔唔駛比人掃，在香港幾乎係約定俗成。係咪犯法，是的，兩樣都違法。但新正頭，大家好來好去，無謂又拉又鎖。情況唔失控，官府隻眼開隻眼閉，總之去到大年初四，假期完畢，一切照舊，再擺即告，收票無怨。市民也自律，大年初四，過份的違泊、一街的小販，自動消失無蹤，官民相安無事三十多年。似無序，卻有序。
但近幾年，唔知邊位天才，突然認為有法必依，犯法必究，開始用行動掃蕩所謂的新春夜市。老實講，佢地係咪犯左法？係﹗犯左法！以前講人情，依家講法律嘛？好的，何不先小人，後君子。春節前開個記招，公告天下：從此新人事新作風，有小販，即拉！先來溫馨提示，日後至少出師也有名。但，有冇官肯做？冇﹗因為稍為有點智商，都知道此著必成關公大災難﹗以今日官場文化，邊個敢出來做衰人？冇﹗咁好啦！你明知此著犯眾憎，仲要下屬做個鐵面執法人；你唔做醜人，卻暗中下旨叫前線員工做大壞蛋。有個咁的良心天才做阿頭，真係要感動流涕﹗
可能天才話：我都受壓架！以前春節小販冇投訴，近年市民投訴好似雪片都飛過黎，我行動都係要回應市民需要即？之但係，上水水貨客多唔多投訴？自由行隨地掉垃圾隨地吐痰又係唔係犯左法？一講呢d，上大人就答曰：要包容呀﹗甚至，水貨客迫爆北區，官方甚至上等人的回應係，不如搞個水貨買賣場，獨立地區分貨，不法事情合法化，公然搞個市集比內地走私客購入走私貨品。衰d講句，係公然挑戰中華人民共和國法律，鼓勵走私漏稅，破壞國家經濟，打擊民族工業，死十次也不足以謝罪呀！之但係，水貨城又真係搞得成喎！又講番春節小販問題，講包容嘛？可唔可以包容小販幾日呢？又唔得喎！記得有人提出，不如春節三日假，搞番個春節夜市區，好似台北夜市咁，等小販可以名正言順做三日生意，當發下新年財好，當比個機會市民創業也好，當係無牌小販規範化也好，但求新正頭，大家happy啦！其實咪又係水貨城果條橋！呀！咁樣又唔得喎！話有食安問題，治安問題，管理問題，總之好多問題。喂喂﹗走私水貨你又可以話冇問題的？走私罪大，定賣串魚蛋罪大先？你講啦？點解走私得，賣魚蛋唔得？係咪想鼓勵市民就業，齊齊加入走私大軍食大茶飯？係咁用心良苦，真係感激不盡！
好似愈講愈遠，又講番個大行動。阿天才既然要搞得個大龍鳳，係咪應該有個周密一點的部署先？用幾個人手，重點打擊邊個地點，點樣包抄，點樣攔截，點樣防守，仲有風險管理，危機管理，每一樣都要細心思考。正如打仗咁，唔係拎支槍衝上前線就得架！要有部署大局的戰略，仲講臨場執行的戰術。仲有，一切都係食環的份內事，所謂自己的事自己做，所有的部署，動用的人力物力都應該只係食環署的資源。只不過，食環的高層天才，往往的想法係：出左事呀，call警察囉！所以，戰略唔講，戰術唔理，總之拉得就拉；唔拉得，要危機管理呀？call 999！警察諗惦！然後呢？閃囉！
司徒師傅話齋：咁咪出事囉！！！！
老實講，昨晚的衝突同佔中時期有點不同，佔中一役，可以話係陣地戰，無論看倌對警察部署幾不滿都好，該役都係兩方先佈好陣勢再決戰，警方亦準備好相當的人手同策略應付。但「魚蛋之役」，完全係一場突擊戰。也許旺角警署已經有所警覺﹐但，大年初一晚，警。力。的。重。點。係。尖。東。個。花。車。遊。行。 所以，話警察夾埋食環去掃蕩小販，呢個講法對警察一d都唔公平。我好相信，警方係無預計到年初一晚會搞到咁大鑊。或許高層會預計食環會搞出個大頭佛，我相信警方手中係有後備兵源應付旺角的突發事件，始終有佔旺在前，一定不會掉以輕心。但這個預算，可能只係用以應付幾十人內的小型衝突，邊有諗到係與幾百人對陣？否則，一早就部署速龍小隊甚至更高武力戒備啦！（當然，我咁低層次的小人物，好難評估到上大人的心思，以上只係猜想）結果係，食環一搞，搞出成百個人反抗。最初期的警力，幾乎係拉雜成軍下到場增援的（增援對象係食環）。而另一方面，現場所謂本土行動，亦未必預計會有大衝突（凌晨出現的口罩黨是何方人馬，需要調查清楚，個人暫不相信佢地係本土行動的預定兵力）。而結果係，本土派見警方派員協助，便動員更多人馬到場增援；而第一批趕到的警員，見人數處於劣勢，不得不派更大武力到場援救（這些援救對象係現場的警力！），結果是次「魚蛋之役」，由市民vs食環，變成市民vs警察。而雙方增援愈來愈多，結果係臨界點爆破，兩方動武收場，而演變成「魚蛋之役」。事發經過，麻煩睇番各大新聞台和報章。
所以，呢場「旺角魚蛋之役」，完全係擦槍走火的典型例子。唔岩聽都要再講，最初到場的警察，原本無心鎮壓（我真心相信），而頭一批的在場市民，亦未必諗過要拿磚塊，放火頭。事情的發展，恐怕係出乎在場眾人之外。而另一方面，中途殺出的口罩人，掉磚頭，放大火，正面和警察武力對打，既狼且狠，招招要人性命，其行動與手法，似乎也不是一般社運人士之所為。是否有狼群介入衝突而令事態升級？還是今日社運人士已進化為狼群？這問題要好好調查！
呢句講出黎，相信好多人會唔岩聽：「成件事，警察角色好無辜。」點無辜？幫人地部門的低智行動執手尾，結果上左戰場，無端打一了一場不應該打的仗，損兵折將之餘，仲要出來解畫，間接將黑鑊揹左上身。本來應該係食環與小販的對壘，結果，變成警察與市民直接駁火；呢場衝突，根本就不應發生﹗現在的結果，是警察傷、市民傷，搞出事的食環？最後無事，著左草走左人，仲唔該都冇聲。今日特首出黎喊話，警察一哥出黎開記招，食環的負責人？屁都唔敢出黎放一個。我認為，最應該出黎解畫的，應該係策劃新春大掃除果位食環署天才先真﹗
警察無辜，市民更無辜﹗春節假期篤左幾十年魚蛋，突然一日，篤魚蛋會變成罪犯滔天，仲因此而打到頭破血流，何苦如此？市民與警方，無端捲入一場不該發生的衝突。真真正正挑起這場衝突的肇事者，即食環署，和那位要求消除春節小販，卻又部署不周的天才官員，卻安然致身事外﹗事件發生至今已十二小時有多，食環署可有官員出來交待？似乎未有！俗語有云：做錯事，出黎講聲sorry都要卦？對於是次衝突，我認為，始作俑的食環署，和那位天才，欠對警隊，欠市民一句對不起﹗累到咁多警察市民受傷，正如盧教授話齋，至少出黎慰問一下人好喎！
高永文稱食環署主任未執行職務前已經受襲 應強烈譴責
旺角凌晨發生警民衝突，引發騷亂，食物及衞生局局長高永文表示，今早聽取了食環署人員的匯報，強調有關的食環署主任在未執行職務前已經受襲，應予以強烈譴責。
高永文晚上出席煙花匯演酒會時說，昨晚約9時有食環署的主任在砵蘭街一帶進行小隊巡邏，未有執法意圖，但已被約50人圍著，期間有人將2輛木頭車推向食環署人員，車上更懷疑有明火煮食的爐具及滾油。
高永文又說，食環署昨晚約9時45分尋求警方協助，強調署方人員一直表現忍讓。
